《小傳日記》問界M9大賣!華為真係不造車咁徙?

　　《小傳日記》廣州車展今日開始,比起年中舉行嘅上海車展,似乎各大車企都比較重視年底呢一次,可能臨近年尾都想谷起盤數,二來愈近農曆年換車意欲都大啲,所以唔少公司都趁今次車展發布新車。

　　其中華為同賽力斯(滬:601127)嘅旗下金系列就喺今次車展發布M9,係第一次有實體車亮相人前。據報今次M9喺今日之前就開始盲訂,即係未見過車就已經落訂,至今已經賣超過3萬架,預計增程版如純電版都賣大約50萬至60萬人仔。

　　雖然華為任正非之前就大大聲話「華為不造車」,不過同賽力斯搞問界都咁耐,事實上如果華為真係要用自己牌頭造車,分分鐘同小米(01810)會有一場惡鬥。華為自己研發嘅鴻蒙系統如今已經喺問界靈活運用,如果要學似小米咁製造一個「手機+汽車+家居」嘅生態圈,都唔係無能力。

　　不過今年4月任正非重申「華為不造車」,而今次個「誓」嘅有效期係5年,比起上次3年又長咗。據講當時問界好多宣傳資料上面嘅牌頭都由「AITO問界」變成「HUAWEI問界」,令人不禁以為華為終於要破戒,後來任正非強調唔可以再用「HUAWEI問界」先無再用。

　　年初華為CEO余承東針對同江淮汽車聯手造車嘅傳聞,就回應話雖然華為已經具備造車技術,不過開廠房買生產線更加浪費人力物力,不如好似而家咁提供軟件上嘅供應,主力研發智能駕駛系統仲好咁話。

　　的確如今神州車市都百花盛放,再出一部「華為汽車」都難有大嚿肉食,如果做系統供應商,話唔定可以開創更加多同唔同車企合作嘅機會,潛在發展可能仲多,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。