《小傳日記》蝕錢兼被追數!康希諾仲有咩前路?

　　《小傳日記》近期藥股大上大落,都因為藥明系成為美國針對核心,令板塊成日都震倉。不過除咗面對打壓,醫藥股本身都啞仔食黃連。

　　康希諾(06185-HK)早排就公布,2021年疫情嗰時曾經計劃向巴西國家衛生監督局申請將旗下疫苗申請緊急使用許可,於是就出咗封「授權函」畀當地公司Belcher代表康希諾向政府機構就疫苗喺巴西註冊同商業化進行必要嘅協商洽談,有效期6個月,除非公司提前撤銷授權。但時隔兩個月巴西政府就已經否決咗康希諾緊急使用許可,於是康希諾再發「撤銷授權函通知」畀Belcher。

　　但係Belcher方面認為自己有做過嘢,於是就向康希諾要求賠償折合大約2.41億人仔嘅收益損失同「精神損失費用」。康希諾就解釋自己無簽過書面協議,估計自己有大啲嘅抗辯立場,即係預計會告唔入。

　　事實上自從疫情完結,康希諾股價就一落千丈。康希諾之前就已經出咗業績預告,總收入按年大減六成半,純損由9.09億人仔擴大到14.47億銀。康希諾都話,收入大減主要係因為新冠疫苗需求下跌,甚至疫苗生產線產能利用率不足而增加咗多餘嘅成本。

　　條路自己揀,當初疫情肆虐,邊個最快造得出第一隻疫苗就有得贏,但研究嘅嘢講唔埋,都係一場賭博,而康希諾就揀咗博一鋪。當然博都有風光嘅時候,2021年初兩個月內就由170銀炒到上450銀。但後來都係敵唔過國際大藥廠,更加之就係疫情完結,康希諾股價亦都反璞歸真,現價20蚊都唔夠。

　　如今嘅康希諾直頭係重新開始,藉著之前收入上升甩咗B,如今又回歸蝕錢。康希諾而家都積極開源,積極開發流行性腦膜炎疫苗,如果商業化到都係大市場,不過都已經係後話,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。