《小傳日記》農夫山泉又跌乜?賣冰都要內捲,競爭點都走唔甩?

　　《小傳日記》神州市場各行各業都要應付內捲,當然內需零售市場都避唔得過而捲。而被持續睇淡嘅農夫山泉(09633-HK),難得喺今個夏天搵到「新水源」,但都係難逃被打殘嘅命運,搞到今日最多跌過5%,成交成9億銀!

　　夏日熱辣辣,就當然想「喝一杯凍檸檬茶」,今個夏天神州就反而唔興買凍飲,反而係買冰杯。雖然神州杯裝嘢飲都唔貴,但更平嘅方法就係買樽裝飲品再加冰。所以神州超市同便利店就開始有冰杯賣,即係杯裝冰,再由消費者自己揀飲咩倒入去,咁就乜都可以係凍飲。

　　作為飲用水龍頭,農夫山泉今個夏天就把握呢個機會賣冰杯,一杯160克喺便利店標價4.4銀人仔,係今年夏天最熱賣嘅冰杯之一。有人就計過,農夫山泉標準550毫升水都係賣

兩銀人仔一支,但160克冰就賣4.4銀,埋起數嚟相當和味。但當然有人都知道賣冰嘅著數,平絕嘅蜜雪冰城稱霸奶茶行業之後就踩到農夫山泉頭上,竟然新出1蚊人仔嘅冰杯,比起農夫山泉冰杯平接近八成!造就今日農夫山泉嘅瀑布式急跌。

　　冰杯除咗平過一杯手搖茶之外,喺年輕人之間會大受歡迎嘅原因仲因為可以DIY。而家小紅書上多咗好多教人點樣用冰杯DIY嘢飲,梳打、茶、果汁、咖啡、益力多等等,隨便任溝就好似玩緊雞尾酒大賽,日日飲都可以有唔同口味,又平又好玩相信就係今年夏天冰杯熱買嘅主要原因。

　　冰杯嘅興起其實對於茶飲股係最大影響,當然蜜雪冰城係應變最快嘅龍頭,即時平價推冰杯,起碼先搶返一部分顧客先算,同時打擊農夫山泉。以1蚊價錢賣冰,計落條數可能真係未必賺到錢,但搶返市佔呢點嚟講的確係有作為,就睇今日農夫山泉仆直就知一定唔會無料到,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。