《小傳日記》地方政府荷包乾塘都要注資,唔想錯過發展快「車」!

　　《小傳日記》港股大時代,成交額見完5000億仲可以再見到6000億,阿豬阿狗都講緊炒股同時,A股方面都迎來開戶潮,咁就可以證明之前嘅一連串政策,確實已經開始撬到啲錢出嚟。面對著咁熾熱嘅資本市場,地方政府都開始出手。

　　今朝零跑(09863-HK)就公布,會發行大約7000萬股內資股,集資大約26億人仔,每股作價40.8銀,比上日收市價溢差唔多三成,佔擴大後股本大約5%。今次認購內資新股總共四名認購人,其中金華市產業基金之前已經入股,今次屬於增持;另外三名認購人分別係武義縣金投、杭州禾合及湖州信創,四個單位都屬於地方國資。

　　而喺上星期大升浪期間,蔚來(09866-HK)都公布旗下子公司蔚來中國,會獲得三個單位嘅現有策略投資者以33億人仔現金增持股份,而蔚來亦會出資100億人仔增資,三個單位分別係合肥建恆新能源汽車投資、安徽省高新技術產業投資以及國投招商,都同樣係地方國資。交易完成後蔚來所持股份將由92.1降為88.3%,但蔚來就有權喺明年底前以相同價格同條款額外再對蔚來中國額外增資200億人仔。

　　事後蔚來主席兼CEO李斌發文感謝合肥市同安徽省嘅信任同支持,感謝國慶前後蔚來中國再次獲得增資支持,亦提到「四年前,安徽、合肥把蔚來從加護病房搶救回來」,相信就係指以前入股蔚來中國嘅決定。

　　連續兩間電動車企喺國慶前後獲得地方國資增資或者入股,相信都唔會係偶然。電動車一直都係神州重要嘅戰略產業,汽車產業一向被稱為工業製造的明珠,牽涉多行業例如金屬、重工、零部件等等,如今電動車更加係大趨勢,無人駕駛、智能車控、車載晶片樣樣都係高科技,造車成功就相當於帶旺一大片產業鏈,如果未來一舉改變全球汽車生產格局,咁就真係前程似錦喇。

　　財政緊絀、基建投資以至存量房等等嘅麻煩問題,令地方政府過去兩、三年來都非常手緊,尤其被告知要「過緊日子」之後就更加唔敢亂用錢,不過地方國資喺咁艱難嘅情況下,仍然願意落重本注資留住電動車產業,睇怕電動車新勢力未來仲可以繼續玩燒錢,股民可以安心持有多陣,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。