《小傳日記》七牛智能股價牛唔起,首掛捱沽股價腰斬變泥牛!

　　《小傳日記》踏入10月份,新股市場愈來愈熱鬧,個個星期都枕住有新股上市,上個禮拜更加有兩隻新股隔日上。而家招緊股嘅有華潤系新成員華潤飲料(02460-HK)。據報道,首日已經錄得149億元孖展認購額,超購近26倍。華潤飲料計劃發行3.5億股,集資最多50.4億銀,為今年港股目前為止僅次於美的集團(00300-HK)嘅第二大IPO。目前華潤系已經有7個成員喺港交所上市,連同招緊股嘅華潤飲料共有8家,可以話人強馬壯,而且個個都實力不凡。所以,招股首日就錄得超額認購26倍並唔意外。反觀今日首掛嘅七牛智能(02567-HK)形勢就弱好多,股價全日捱沽,收市腰斬至1.19銀,比上市價2.75銀低56.7%。

　　論股東背景,七牛其實都唔弱,股東包括阿里巴巴、仲有內地知名嘅雲峰基金、啟明創投、經緯創投、交銀基金及中國國有企業結構調整基金等。而創辦人許式偉之前係金山軟件(03888-HK)嘅技術總監,協助金山軟件設立專注於研發分散式存儲技術嘅實驗室,之後喺知名互動娛樂媒體企業盛大網路擔任高級研究員,主導推出盛大網盤及盛大雲計算,並非無名小輩。

　　七牛智能上市之路一波三折,公司曾經喺2021年2月申請赴美上市,但最後無功而回,公司解釋係自願撤回美國上市申請,原因當時美國資本市場情況不利。公司今年兩次向港交所遞表,同樣未能成功,要喺第三次遞表,最終先獲得成功上市機會。只可惜,千辛萬苦上咗市,仲要係接近下限定價,但股價第一日就已經上唔到岸,全日潛水。

　　咁又難怪小股東抽到就想走,事關公司年年蝕錢,由2021年至2023年,公司分別虧損約2.2億銀、2.13億銀及3.24億銀。三年嚟虧損情況無改善,甚至蝕多咗近半。蝕錢都算啦,只要慢慢改善,畀投資者睇到希望,相信股價都未至於會咁差。只可惜公司今年第一季虧損情況繼續惡化,蝕幅仲要比舊年同期上升50.5%。

　　如果用上市價2.75銀計算,公司市值接近55億銀。比較近磅、而且業務比較相似嘅同行明源雲(00909-HK)市值約56億銀,百融雲(06608-HK)市值都係46億銀。三家公司中,只得百融雲有錢賺,所以無法用市盈率比較。如果用市銷率比較,明源雲市銷率約為3.15倍,百融雲市銷率約為1.59倍。七牛智能如果按上市價2.75銀,市值55億銀計,則市銷率約3.78倍,明顯比前兩者更高。

　　如果以今日收市價1.19銀計,市值約23.8億銀,市銷率約1.63倍,同百融雲相近,不過人地就賺緊錢,2022年賺2億幾銀,2023年賺3億幾銀,今年上半年就算賺少咗,都仲賺緊1.3億銀。反觀七牛智能,今年第一季度虧損擴大50%,蝕1.43億銀。至於營收方面,百融雲2023年營收比2021年上升65%,而同期七牛智能反而下跌9%。

形勢比人弱,畀你會點揀?所以七牛今日股價牛唔起,金牛變泥牛,唔係無原因嘅。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。