《小傳日記》老鋪黃金講故仔有睇頭,一口價奢侈品路線有錢途!

　　《小傳日記》老鋪黃金(06181-HK)今日股價暴升,最多升14.6%,高見223.4銀,創歷史新高。呢次破頂,真係要多謝噚日摩通出嘅研究報告。摩通首予老鋪黃金評級「增持」,目標價為229.4銀。最重要嘅係,摩通將老鋪黃金列為行業首選,傳統大牌子周大福(01929-HK)都企埋一邊。摩通話老鋪黃金正形成一個獨特嘅「中國奢侈品」品牌,真係幾有睇頭!

　　諗到奢侈品,第一反應梗係「貴」啦!款式類似嘅吊墜,老鋪黃金18.2g就賣到2萬出頭,而周大福20.96g先賣萬九出頭。再睇睇老鋪黃金啲產品,咩花絲如意祥雲紋手鐲賣近

7萬,貔貅福珠手鏈12.8萬,甚至有纏枝寶相花金碗賣到37.8萬,一把越王寶劍擺件竟然高達78.9萬!呢啲價格聽落都好震撼。

　　老鋪黃金唔單止貴,佢嘅定價都好任性。平時行街見到嘅金鋪,都會將每日黃金價格同回收價格擺出來,遇到有活動嘅仲會話減免手工費。而老鋪黃金係國內唯一一間採用「一口價」嘅定價方式嘅品牌,佢唔會標註每克金價同手工費。

　　又賣得貴,又賣得好,離唔開老鋪黃金講故仔嘅功力,哄到消費者落嗒。老鋪黃金宣傳自己係傳承咗清朝宮廷造辦處金匠百餘年來積澱嘅花絲、鏨刻、鑲嵌、燒藍等古法工藝,其中部分傳統工藝如「花絲鑲嵌」、「金銀錯」技藝仲係國家非物質文化遺產,具有非遺文化價值。又係宮廷傳統,又係國家非物質文化遺產,買啲金飾都好似買咗件藝術品咁,係唔係突然間覺得好似冇咁貴啦。其實花絲、鏨刻、鑲嵌、燒藍呢d專業名詞有幾個消費者真係明白咩意思?最緊要就係夠「高大上」。

　　再加上老鋪黃金嘅設計獨特,堅持中國傳統審美,融合咗古代紋樣、神話故事、佛教文化、宮廷風格等元素,仲食住近年興起嘅新中式穿搭、古風文化嘅東風。隨著消費者對中國古代非物質文化遺產的認可度大大提升,老鋪黃金嘅設計風格都係消費者心目中留下明顯嘅品牌印象。

　　一邊係老鋪黃金賺到笑,而另一邊周大福、六福(00590-HK)呢啲大牌子連續幾個季度業績唔掂,股價仲係節節敗退,真係有啲尷尬。會唔會呢條奢侈品路線先係黃金飾品企業破圈嘅出路呢?畢竟,貴有貴做法,將黃金變成一件藝術品,唔單止賣個金價,仲係賣個故事、賣個情懷。周大福同六福,你哋係咪時候試吓新玩法,唔好再局限喺傳統思維度打圈圈呢?請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。