《小傳日記》神州餐廳綠茶ＩＰＯ三戰三敗，餐飲股吸引力無曬？

　　《小傳日記》今日魚缸好樣返少少，多得電動車跑得快好世界，ＢＹＤ（０１２１１）出盈喜報捷，預期第三季賺多三倍，連帶花旗國Ｔｅｓｌａ都造好，今日汽車板成為全日第二表現好板塊，ＢＹＤ全日報升。

　　呢幾日都有唔少新股敲鑼，噚日上唧潤歌互動（０２４２２）上市後表現唔錯，噚日升一倍有多，每手４０００股唔計交易費可以執２８４０銀，以呢年嘅新股嚟講都算係咁。

　　不過有人歡喜有人愁，神州公司要嚟香江上市都唔係容易，講緊就係上面嘅餐飲公司綠茶。

　　可惜就係連埋今次，綠茶已經第三次申請上市失敗，原因好有可能同佢哋嘅盈利能力有關。

雖然舖頭數目一直增加，但係翻枱率就連年下跌，由２０１８年每日３﹒４８次，跌到去２０２０年每日２﹒６２次，淨利潤率亦由２０１８年３﹒４％跌到２０２０年１％，盤數唔靚當然就過唔到聯交所嗰關。

　　一來綠茶自己盤數唔靚，二來餐飲股喺魚缸真係唔馨香，諸如海底撈（０６８６２）、九毛九（０９９２２）甚至都係茶嘅奈雪的茶（０２１５０），滾完一輪煲乾水之後都好快見底，尤其翻枱率方面完全暴露餐飲股缺憾，就算擴張速度快，客群增長速度往往都追唔上，再加上疫情打擊，缸邊友可謂一見餐飲股就驚。唔少好似綠茶咁嘅新晉餐飲公司，都一直只係執著於擴充，但係反而基本業務未見好，未學行先學走就急住上市，亦都令佢哋嘅投資吸引力愈減愈低，請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。