《小傳日記》大行警告係時候清醒!魚缸條理智線係邊度?

　　《小傳日記》魚缸史詩式大升浪疑似有摸頂跡象,今朝升完轉跌,到尾市再升破22700上年高位,好友不輕易言敗,但今日成交額已經開始減少到得返2600幾億,反映而家同前幾日嘅一面倒睇好已經有啲唔同。

　　呢兩日其實孖屐明顯開始有啲氣氛唔同,多咗人開始擔心高位回吐。就連大行都坐唔住腳,野村經濟學家就對投資者警告,股市狂熱之後就有機會崩盤,有可能類似2015年情況,認為目前最需要就係擺脫大升嘅美夢,要進行更清醒嘅評估。野村提到神州經濟仍然受內房危機以及地方債問題影響,基本面對股市無支持,反彈如果轉變成泡沫破裂,甚至會令經濟陷入更糟糕局面。

　　怕高都係人之常情,由低位計到今日,恒指已經大升咗4700點,全部都係半個月內發生嘅事,一切都係因為政策憧憬帶動嘅後市。但至今其實都未有最新數據出爐,針對樓市一連串政策會幾有效都未清楚,可能都要等到11月中公布嘅10月份三頭馬車數據先可以正式反映政策成效。

　　以近期升市火車頭內房股為例,今日整體走勢都算係個別發展,有升有跌,而幅度比起之前都係細咗,更重要係呢兩日內房股單日表現都非常波動,可以開市頭幾分鐘跌完之後倒升,又或者升完無耐之後倒跌,其實就係反映孖屐而家不安燥動嘅心理。

　　嚟緊今個月中其實會先有一次數據公布,但只係9月份數據,好多政策都係今個禮拜先正式生效,所以9月份數據一定未可以反映政策影響,但至少都唔可以差,如果唔係現行嘅大好氣氛就會洩咗道氣。

　　後市點去確實未知,但目前一定要開始回歸理智,近期A場散戶大舉進場,券商更加開戶開到手軟,陰跌都算,暴跌的話小股民可能係會輸身家,到時哀鴻遍野相信都唔係上面所樂見,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。