《小傳日記》再有智駕獨角獸險穿招股價,睇一指標就知市值高估!

　　《小傳日記》百億智駕獨角獸地平線(09660-HK)上市仍難逃破發「魔咒」。噚日(24日)地平線首日上市,開盤價5.12銀,較招股價3.99銀高出28.36%,隨後股價直升,開盤幾分鐘就衝到當日最高位5.5銀,升幅為37.84%,盤中市值最高達到716.53億銀,市場都未嚟得切興奮,地平線就從高位一路下跌,當日收報4.10銀,今日就低見3.6銀,終究逃唔過破發嘅命運,好在收市升番少少,勉強保住招股價水平。

　　若要問筆者,其實呢個情況唔算意外,因為早喺8月8日,作為港股「中國自動駕駛晶片第一股」嘅黑芝麻(02533-HK)喺上市首日,開盤價18.8銀,一開市就已經比招股價28銀跌咗32.9%,首日就破發,今次只不過歷史重演啫。

　　地平線和黑芝麻都屬於國內智駕晶片領域嘅佼佼者,被認為係國內汽車Soc晶片自主化啲希望,而大部分神州大型汽車廠商都係地平線嘅客戶添,但點解都係難逃破發「魔咒」?

　　原因就係大家沉重嘅「希望」度!睇返地平線和黑芝麻的市銷率,地平線市銷率達33.5倍,黑芝麻仲誇張,現價計有44倍,對比同樣係智駕領域嘅佼佼者,以色列公司

Mobileye嘅市銷率先得4.85倍左右。中資智駕獨角獸定價夠晒進取,市值已經反映埋未來幾年嘅增長潛力,反過嚟睇,都可以話佢哋嘅市值可能被嚴重高估。

　　巨額虧損係每家初創公司無得迴避嘅問題。從財務表現睇,2021年至2023年,黑芝麻智能嘅淨虧損分別係23.56億銀、27.54億銀、48.55億銀,三年累計淨虧損接近100億銀。同期,地平線嘅淨虧損分別係20.63億銀、87.19億銀、67.39億銀,三年累計淨虧損更接近200億銀。地平線喺招股書解釋話,虧損主要係由於報告期內為增強核心關鍵技術而產生嘅大額研發開支,以及優先股同其他金融負債嘅公允價值變動。

　　雖然智駕系統甚至無人駕駛技術係大勢所趨,但行業內部競爭激烈,智能駕駛晶片嘅更新換代周期大概係18個月,面對行業快速發展,公司就要不斷推出適應市場需求嘅新產品,先至唔會被市場淘汰,背後就要拼技術儲備、創新能力同研發速度,一隻字講晒,錢!

　　再講返市場環境,2023年以來,汽車零部件企業面臨來自車企嘅強烈降價壓力,行業內捲加劇,供應商被迫降本應對。喺呢種情況下,智駕晶片行業嘅競爭就只會更加殘酷。

　　未來再有類似地平線嘅公司上市,投資者記住,喺市值被同行嚴重高估嘅情況下,短炒或有機會,但長線投資就要謹慎考慮啦,唔好以為高估值就一定係「必抽」新股,抽到手分分鐘「俾

人帶走」呀,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。