《小傳日記》侵侵全球開戰捍衛花旗國工業,先炸中本國企業!

　　《小傳日記》香江魚缸今日經歷咗至暗一日,恒指挫穿兩萬關,單日跌幅超三千點,不斷刷新最大單日跌幅記錄。唔單止港股,亞太股市亦哀鴻遍野,被課稅力度遠超預期嘅越南亦唔好過,股市經歷咗近三年嚟最慘烈嘅一周,VN指數單日暴跌6.7%,外資單日淨流出創8年新高,屬於出口產業嘅紡織服裝板塊以18.22%的跌幅居冠,成為投資者最想拋售嘅板塊。咁算唔算股災呢?而家已經見到有啲行家會咁形容,但筆者就覺得睇定啲先,一切要等到4月9日花旗國對等關稅正式生效先算數。

　　自由貿易係當今全球化嘅基石,所以有人話,侵侵代表鐵鏽帶工人發起關稅戰,就係逆全球化嘅第一槍!但其實呢一槍最後都係會開到自己人身上。首當其衝嘅就係花旗國嘅服裝、家具和玩具企業,雖然最後都係主要賣番去花旗國,但產能上就集中喺東南亞市場企業,所以呢次真係全面中招。Nike股價暴跌14.44%,直接蒸發咗138億美金;Adidas跌9.94%,市值減咗30億;Lululemon跌9.85%,少咗31億。Nike超半數嘅鞋係越南生產,25%喺印尼,14%喺神州。而Lululemon更加誇張,68%嘅產能喺越南。咁多產能壓喺同一個國家,當有風吹草動,企業基本冇咩迴旋餘地。

　　以Nike為例,如果佢想逃避東南亞重稅嘅影響,就要喺18個月內搬走超過兩億雙鞋嘅產能,相當於佢全球產量嘅三分之一。但問題係,其他國家例如印度、墨西哥啲工廠加埋都只可以接到15%嘅訂單,要喺短時間內搵一個可靠又低成本嘅地方轉移咁大規模嘅產能,真係天方夜譚。

　　如果呢啲全球資本猛獸要將產能搬番花旗國,就更加唔現實,發達國家有幾多人會願意忍受喺流水線工廠做低薪又沉悶嘅工作?台積電將高精尖晶片產能搬到花旗國尚且要花費九牛二虎之力,技術成分唔高唔精又唔尖嘅普通工廠就更加難以落地。當然花旗國科技發達,開無人工廠咪得囉,可惜技術未成熟,Adidas之前嗰個Speedfactory項目就係血淋淋嘅教訓。

　　喺2016年,Adidas推出咗Speedfactory項目,目標係喺德國同花旗國設立全自動化工廠,減少對亞洲供應鏈嘅依賴,但又可以避開歐美高昂嘅人工成本。聽落好似好完美,但受技術所限,最終結果就係兩間工廠加埋一年淨係可以生產100萬雙鞋,佔佢全球年產量嘅0.25%。產能太低根本支撐唔起規模經濟,「本土鞋」要賣到250歐元一對,市場根本唔買帳。幾年之後,Adidas無奈關閉Speedfactory。

　　當缺乏本土製造業,侵侵哪怕徵稅徵到100%,最終都係由消費者自己埋單啫。市場分析話,Nike　Air　Jordan　1因為關稅問題,花旗國消費者買一對可能就要貴多18美金,都唔需要估都知花旗國通脹數據會直線上升。

　　花旗國開啟大徵稅時代,外界大呼不智,直言侵侵錯把寶當禾稈草!事實上,捍衛全球最大消費市場地位,令其他國家長期以來形成對美元嘅不對稱性單邊依賴,支持美元成為世界貨幣,先係花旗國作為經濟強國嘅根基,所謂嘅貿易逆差根本係對自己有利。聽聞花旗國唔少商界精英要準備到海湖莊園為侵侵上堂,但侵侵本人受唔受教就好難講,欲知後事如何,就要跟實經濟通,不過趁低吸納就大可不必,揸住茄殊先啦,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。