《小傳日記》寧王股權集中開心大發現!殊不知雪王都係咁……

　　《小傳日記》近排魚缸新股市場真係旺咗好多,雖然大部分都係A股回H,但有集資就有錢入市,對於提升返港股國際IPO都地位都係有所得益。

　　比起早一兩年嘅新股寒冬,上埋啲都係三四線奀股,真係敲完鑼都無人聽到。而近期又「雪王」又「寧王」,連波叔同陳翊庭都成日出場站台,就知魚缸IPO真係全面活化,而寧德時代(03750-HK)更加成為年初至今全球最大集資額公司,有價有份量,當然睇到人牙癢癢。

　　人紅多是非,除咗美國有議員唔老黎摩通唔聽話硬係要幫寧王搞IPO,仲有連休養嘅David　Webb都忍唔住要關注一下。阿Webb就話,計埋超額配股之後,H股數量只有大約1.56億股,佔公司總股本3.42%;而呢1.56億股入面,有大約7745萬股喺11月19前都係禁售,變相未來半年都係炒剩低7846萬股,前25名H股股東亦已經持有H股股份近七成,變相散戶炒緊嘅股數就更加少。

而寧王嘅火爆當然都吸引咗佢去留意。需求上升刺激價格上漲,係經濟學最基本嘅供求定律。而呢一個定律,近年都被活用於新股市場之中,尤其神州就熱愛呢種炒法。

　　其實除咗「寧王」之外,活用供應量少要炒高股價嘅,連前面提到嘅「雪王」都一樣。蜜雪(02097-HK)上市當日高收43%報290銀,截至今日更加高見563銀,以招股價計至今每手已經暴賺36050銀,抽到到而家都未放可算係大富大貴。不過雪王情況其實同寧王差唔多,以雪王發行約1.51億股H股計,創辦人張紅超同張紅甫各自持有約5454.7萬股H股,已經係H股發行總股數嘅73.56%,再計埋5名基石投資者合共持有769.26萬股(佔H股發行總數5.1%),即係1.51億股H股面入面,有近1.17億股都係非流通,雪王呢1.78倍升幅,全部都係靠剩低嘅約21%流通H股炒上嚟,比起寧王同樣係流通股量極低。

　　股權集中唔好呀,不過股權集中可以令到股價飛天,蜜雪升緊就快兩倍,至今個個有錢賺,又有邊個理集唔集中?係估唔到大如寧王都要用呢套方法啫,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。