《小傳日記》A股炒作玄學,連董事長生肖都攞來炒,散戶莫亂跟!

　　《小傳日記》近排A股市場又搞起「蛇年概念」嘅炒作。噚日(2日),據不完全統計,居然有21家董事長屬蛇嘅A股股價直接漲停,網上仲整理咗屬蛇嘅A股上市公司董事長嘅懶人包。其實,今年9月已經炒過一轉,當時炒公司名同蛇年有關嘅概念股。炒個公司名,都仲可以理解,但今次連董事長嘅生肖都特登挖出嚟炒,真係夠晒「創意」!

　　筆者睇吓蛇年概念,名入邊帶住個「蛇」或者「蟒」嘅股份其實唔多,更多嘅係一啲純粹搞笑嘅聯想,例如博士眼鏡(300622-CN)對應「眼鏡蛇」;白銀有色

(000960-CN)對應「銀環蛇」;青島金王(002094-CN)對應「竹葉青」。好多投資者都話呢個玩法太過無厘頭,筆者就覺得呢個名單攞去做猜謎語就啱晒嘞。仲有普通諧音嘅,例如斯萊克(300382-CN)諧音snake(蛇)。

　　講真,A股嘅玄學炒作近排真係見唔少。11月20日,日出東方(603366-CN)上演「地天板」行情,收穫13天11板,跟住市場就搞出個「名字玄學」,當日公司名中帶有「東方」兩個字嘅個股,好似東方精工(002611-CN)、大東方(600327-CN)、東方智造(002175-CN)　呢啲普遍都收漲停板。及後22日,又出現「代碼玄學」,同因日出東方,今次又搞出個「代碼玄學」,類似日出東方兩個股票代碼一樣嘅個股出現漲停潮,好似渤海化學(600800-CN)、粵桂股份(000833-CN)、海寧皮城(002344-CN)呢啲。

　　而今次出現嘅生肖概念更係A股每年年尾嘅「例牌大戲」,就好似2024年系龍年咁。從　2023年9月中下旬就開始炒作,聖龍股份(603178-CN)、天龍股份(603266-CN)　呢啲好多帶住個　「龍」字嘅股票呀,就好似坐火箭咁大幅拉升。但係炒作完之後,到咗今年2月,總共有25隻股份年內跌幅超過四成,之前被炒到好高嘅龍洲股份(002682-CN)　跌幅最甘,年內瀉咗六成,真係「炒得越高,跌得越痛」。

　　生肖概念股嘅短線內確實有啲熱炒效應,但大家都知,呢種炒作冇基本面支持,炒作風險大到不得了,簡直就好似玩高空踩鋼絲咁,一個唔小心就仆直。有投資者話,呢啲玄學炒作都係因為莊家搞唔出咩正經嘅賺錢途徑,唯有靠炒作呢啲旁門左道嘢嚟博一博。而且,喺2023年龍年生肖概念股嘅炒作中,確實唔少出名嘅游資同內地大炒家都有份參與,將股價推高,然後自己就拍拍屁股走人,搞到班小散戶做曬大閘蟹,到時叫天不應叫地不聞就認真殘情。請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。